అస్మదీయులకే భవానీ ద్వీపం - ఏటా రూ. 1.11 కోట్ల లీజుకే ‘గంటా’కు అప్పగింత తెరవెనుక చక్రం తిప్పిన సర్కారు పెద్దలు నేడో రేపో జీవో జారీ

హైదరాబాద్, న్యూస్‌లైన్: కనకదుర్గమ్మ కంటినీడలో... ప్రకాశం బ్యారేజీ పక్కనే... కృష్ణమ్మ ఒడిలో కొలువుదీరిన ప్రఖ్యాత పర్యాటక క్షేత్రం భవానీ ద్వీపం ఇప్పుడు ప్రైవేటుపాలు కాబోతోంది. కుటీరాలు, బోటింగ్ జట్టీలు, ఓపెన్ ఎయిర్ థియేటర్, రెస్టారెంట్లతో 133ఎకరాల విస్తీర్ణంతో పర్యాటకులను విశేషంగా ఆకట్టుకుంటున్న ఈ ద్వీపాన్ని అస్మదీయులకు అప్పగించేందుకు సర్కారు సిద్ధమైంది. కాంగ్రెస్ సరికొత్త నేత చిరంజీవికి అత్యంత సన్నిహితుడు ఎమ్మెల్యే గంటా శ్రీనివాసరావుకు చెందిన సంస్థకు కేవలం ఏడాదికి రూ.1.11 కోట్ల లీజుకే అప్పగించేందుకు ఏర్పాట్లు పూర్తయ్యాయి. ఈమేరకు సర్కారు పెద్దలు తెరవెనుక పెద్ద ఎత్తున మంత్రాంగం నడిపినట్లు తెలుస్తోంది. నేడో రేపో ఉత్తర్వులు వెలువడనున్నట్లు సమాచారం. ‘ఇంటిగ్రేటెడ్ టూరిజం ప్రాజెక్టు అభివృద్ధి’ పేరిట విజయవాడ భవానీ ద్వీపాన్ని ప్రైవేటీకరించాలని రాష్ట్ర పర్యాటక అభివృద్ధి సంస్థ(ఏపీటీడీసీ) నిర్ణయించింది. ప్రభుత్వ, ప్రైవేటు భాగస్వామ్యంలో బిల్డ్-ఆపరేట్-ట్రాన్స్‌ఫర్(బీవోటీ) ప్రాతిపదికన రూ. 60 కోట్ల వ్యయంతో అభివృద్ధి చేయడానికంటూ గత ఏడాది సెప్టెంబర్‌లో టెండర్లు ఆహ్వానించింది. కాన్ఫరెన్స్ హాళ్లు, రెస్టారెంట్లు, కాటేజీలు, వెల్‌నెస్ జోన్ (హెల్త్ స్పా, రిసార్ట్స్, యోగ, ధాన్యం, స్విమ్మింగ్ పూల్స్, హెర్బల్ గార్డెన్), ఎంటర్‌టైన్‌మెంట్ జోన్ (మినీ గోల్ఫ్ కోర్సు, క్రాఫ్ట్ విలేజ్)తో పాటు సాధారణ మౌలిక సదుపాయాలు కల్పించాలని పేర్కొంది. ఆ మేరకు అభివృద్ధి చేసినందుకు 33 సంవత్సరాల పాటు లీజుకు ఇచ్చేందుకు సంసిద్ధత వ్యక్తంచేసింది. ఈ మేరకు తొలి సంవత్సరం రూ. 1.11 కోట్లు చెల్లిస్తానని, ప్రతి రెండేళ్లకు 10 శాతం చొప్పున పెంచుతామని కాంగ్రెస్ ఎమ్మెల్యే గంటా శ్రీనివాసరావుకు చెందిన కంపెనీ ‘అధిక మొత్తానికి టెండర్లు’ దాఖలు చేసింది. 20 సంవత్సరాల తర్వాత నుంచి 33 సంవత్సరం వరకు అధిక మొత్తం లీజు ఇవ్వడానికి సంసిద్ధత వ్యక్తం చేసింది. దీంతో అధికమొత్తం కోట్ చేసిన ఆ కంపెనీకి ద్వీపాన్ని అప్పగించాలని ఏపీటీడీసీ నిర్ణయించినట్లు సమాచారం. ఈమేరకు ఒకట్రెండు రోజుల్లో జీవో కూడా వెలువడనుందని అధికార వర్గాల సమాచారం. అయితే 33 సంవత్సరాల్లో అభివృద్ధి చేయాలనడమే తప్ప ఎప్పుడు మొదలు పెట్టి ఎప్పుడు పూర్తి చేయాలనే నిబంధన ఏమీ లేకపోవడం గమనార్హం. కొద్దిపాటి మౌలిక సదుపాయాలు అభివృద్ధి చేసి భారీగా వ్యాపారం చేసుకొన్నా లాభాల్లో వాటా అడిగే హక్కును ఏపీటీడీసీ కోరకపోవడం అనుమానాలకు తావిస్తోంది. టెండర్లలో పేర్కొన్న విధంగా మౌలిక సదుపాయాలు కల్పించకుండా తూతూమంత్రం సౌకర్యాలతో 33 సంవత్సరాల పాటు వ్యాపారం చేసుకొని కాంట్రాక్టర్ వెళ్లిపోయినా ప్రశ్నించే హక్కు ఏపీటీడీసీకి లేకపోవడం గమనార్హం. ఉద్యోగుల్లో వ్యతిరేకత: ప్రస్తుతం భవానీ ద్వీపంలో 24 గదులు, రెండు రెస్టారెంట్లు, సమావేశ మందిరం, మూడు చెట్ల మీద కుటీరాలు, ఓపెన్ ఎయిర్ థియేటర్, బోటింగ్ జట్టీలు.. తదితర సౌకర్యాలున్నాయి. సరాసరిన 70 శాతం ఆక్యుపెన్సీతో పర్యాటకులను ఆకట్టుకుంటోంది. మరికొన్ని అదనపు సౌకర్యాలు కల్పిస్తే పర్యాటకుల సంఖ్య, ఆదాయం పెరిగే అవకాశమున్న ద్వీపాన్ని కేవలం రూ.1.11 కోట్ల లీజుకు ప్రైవేటు సంస్థకు అప్పగించడంపట్ల ఉద్యోగులు వ్యతిరేకత వ్యక్తంచేస్తున్నారు. అయితే మంత్రుల సాధికార కమిటీ ఆమోదంతోనే భవానీ ద్వీపం ప్రైవేటీకరణకు టెండర్లు పిలిచామని, తమ పాత్ర పరిమితమేనని ఏపీటీడీసీ అధికార వర్గాలు తెలిపాయి.

http://www.sakshi.com/main/FullStory.aspx?catid=260171&Categoryid=1&subcatid=33