మేటలు వేసిన నల్లధనం

నల్లధనంపై ప్రభుత్వం డొల్లతనం మరోమారు బయటపడింది. విదేశీ బ్యాంకుల్లో మేటలు వేసిన నల్లధనాన్ని వెలికి తీయడంలో చిత్తశుద్ధి కొరవడింది. వేలాది కోట్లు అక్రమంగా విదేశాలకు నల్లకుబేరులు తరలించేస్తున్నారు. వీరి ఆగడాలు యథేచ్ఛగా సాగిపోతున్నాయి. నల్లధనాన్ని దాచుకోడానికి స్విస్ తదితర బ్యాంకులు స్వర్గ్ధామాలు. ఈ బ్యాంకుల్లో కుప్పలు తెప్పలుగా మనదేశానికి చెందిన బడా నేతలు, వ్యాపార వేత్తలు ఖాతాలు తెరిచారు. నల్లధన ప్రవాహం జీవనదిలా సాగిపోతోంది. ఇది ఇప్పుడు బహిరంగ రహస్యం. ఓ చిరుద్యోగి నుంచి ముక్కుపిండి మరీ పన్నులు వసూలు చేస్తున్న యంత్రాంగం బడాబాబులు దొడ్డిదారిలో వేలాది కోట్లు తరలించేస్తుంటే కళ్లప్పగించి చూస్తోంది. విదేశీ బ్యాంకుల్లో అక్రమ సంపాదనలు, పన్నులెగ్గొట్టిన ఆర్జన అంతా ఎంతో సురక్షితంగా ఉంది. అవినీతిని అంతమొందిస్తాం, నల్లధనాన్ని వెలికి తీస్తామంటూ ఉపన్యాసాలతో ఏలికలు ఏళ్లూపూళ్లూ గడిపేస్తున్నారే తప్ప ఈ దిశగా తీసుకున్న చర్యలు కనబడడం లేదు. ఇప్పుడు తాజాగా జెనీవాలోని హెచ్‌ఎస్‌బిసిలో రహస్య ఖాతాలున్న భారత నల్ల కుబేరుల జాబితా వెలుగులోకి వచ్చింది. భారత ప్రభుత్వానికి ఫ్రాన్స్ అందజేసినట్టుగా చెబుతున్న ఈ జాబితాలో ఏకంగా 700పై చిలుకు అపర కుబేరులున్నారు. వీరిలో ముగ్గురు ఎంపీలు కూడా ఉన్నారన్న వార్తలు కలకలం రేపుతున్నాయి. ప్రజాప్రతినిధులే అడ్డంగా దేశాన్ని దోచి మూటగట్టి విదేశాల్లో దాచి పెట్టడం విస్తుగొల్పుతోంది. వీరిలో అధికార పక్షీయులెవరో తెలీదు.. ఒక వేళ తెలిసినా వారి వివరాలు యుపిఏ సర్కారు బయటపెడుతుందన్న నమ్మకమూ లేదు. ఇప్పటికే కామనె్వల్త్, 2-జి కుంభకోణాల్లో పీకల్లోతు కూరుకుపోయిన యుపిఏ సంకీర్ణంలోని నేతలెవరైనా ఈ జాబితాలో ఉంటే, ఆ వివరాలు బయటపెట్టి తన గొయ్యి తానే తవ్వుకోదు. అందుకేనేమో ఒప్పందం ప్రకారం ఈ జాబితాలోని పేర్లను ఈ దశలో బయటపెట్టలేమని కేంద్ర ఆర్థిక మంత్రి ప్రణబ్ ముఖర్జీ తేల్చి చెప్పారు. మరెప్పుడు బయట పెడతారో మంత్రివర్యులకే తెలియాలి. నల్లడబ్బు వెనక్కి రప్పించడంలో కేంద్ర ప్రభుత్వ నిష్క్రియాపరత్వాన్ని అర్థం చేసుకున్న అత్యున్నత న్యాయస్థానం (సుప్రీంకోర్టు) కలుగజేసుకుంది. నల్లధనం వెలికి తీసేందుకు ప్రత్యేక దర్యాప్తు బృందం (సిట్)ను ఏర్పాటు చేయాలని ఆదేశించింది.

మన దేశంలో అపర కుబేరులకు కొదవ లేదు. ఆబాపతు ఘనుల సంఖ్య లక్షకు దాటింది. ఇది ప్రపంచ వ్యాప్తంగా అందరికీ తెలిసిన విషయమే. ఇప్పుడు భారత్‌లో నల్లకుబేరుల సంఖ్యా పెరుగుతోందన్నది విస్మయం కలిగిస్తోంది. విదేశీ బ్యాంకుల్లో మూలుగుతున్న నల్లడబ్బులో అత్యధిక శాతం భారతీయులదే. నల్లధనంలో మనవాళ్లు అభివృద్ధి చెందిన దేశాలను మించిపోయారు. ఒకప్పుడు ఆంగ్లేయుల పాలనలో దేశ సంపద విదేశాలకు తరలిపోయిందని చదువుకున్నాం. ఇప్పుడు ఆ పనిని మనవాళ్లే యథేచ్ఛగా చేసేస్తున్నారు. అధికారులు, నేతలు, వ్యాపారవేత్తలు అక్రమార్జనను గుట్టుచప్పుడు కాకుండా విదేశాల్లో జమ చేస్తున్నారు. కాంట్రాక్టులు, అధికార దుర్వినియోగాలతో ఆర్జించిన మొత్తాన్ని ఇలా తరలించేస్తున్నారు. పన్నులు చెల్లించకుండా దాచిపెట్టిన సొమ్మును ఏయేటికాయేడు మూటగట్టేస్తున్నారు. దేశ ఖజానాకు గండి కొడుతున్నారు. ఒక్కొక్కటిగా వెలుగు చూస్తున్న స్కాములలో కోట్లాది రూపాయలు గల్లంతయ్యాయి. సరళీకరణ పేరుతో నిబంధనలకు నీళ్లొదిలి గేట్లు బార్లా తెరవడంతో విదేశీ బ్యాంకులు నల్లధనానికి కేరాఫ్ అడ్రస్‌గా మారుతున్నాయి. అసలు ఈ బ్యాంకుల్లో భారత్‌కు చెందిన వారి ఖాతాల కింద ఎంత డబ్బుందో ఇప్పటికీ సరైన సమాచారం లేదు. ఇదీ నల్లధనం వెలికితీతపై మన ఏలికలకు ఉన్న చిత్తశుద్ధి. 45 కోట్ల బీదలు కనీస అవసరాలకు నోచక విలవిల్లాడుతున్న భారతం ఒకవైపు.. దేశాన్ని కొల్లగొట్టి లక్షలాది కోట్లు విదేశాల్లో దాచేస్తున్న నల్లకుబేరులు ఒక వైపు. ఇంత జరుగుతున్నా కేంద్ర ప్రభుత్వంలో చలనం రాదా..? మొన్న స్విస్, ఇప్పుడు హెచ్‌ఎస్‌బిసి రేపు మరొక బ్యాంకులో.. ఇలా నల్లధనం అడ్డూఅదుపూ లేకుండా పెరిగిపోతోంది.

సర్కారు ఖజానాకు సంపన్నుల పన్ను ఎగవేత ఓ సవాలుగా మారుతోంది. నల్లధనాన్ని దాచిపెడుతున్న బ్యాంకుల పనిపట్టేందుకు నిబంధనలను మరింత కఠినతరం చేయాల్సిన అవసరం ఉంది. ఆయా బ్యాంకుల నుంచి ఈ మేరకు సమాచారం తెప్పించుకునేందుకు కృషి చేయాలి. ఇందు కోసం స్విట్జర్లాండ్, తదితర దేశాలతో ద్వైపాక్షిక ఒప్పందానికి చొరవ చూపాలి. దాదాపు 90 దేశాలతో స్విస్ ప్రభుత్వం ఈ మధ్యనే ఇటువంటి ఒప్పందం చేసుకుంది. నల్లకుబేరుల సమాచారాన్ని వెల్లడించేందుకు ఆ దేశ ప్రభుత్వంపై తీవ్ర ఒత్తిడి తేవాలి. ఇది అసాధ్యమేమీ కాదు. తమ దేశానికి చెందిన నాలుగు వేల పైచిలుకు రహస్య ఖాతాల వివరాలను బహిర్గతం చేసేందుకు స్విస్ ప్రభుత్వంతో అమెరికా ఈ మధ్యనే ఒప్పందం చేసుకుంది. ఈ విషయంలో అమెరికా ఆదర్శంగా నిలిచింది. కానీ, నల్లధనం వెనక్కి రప్పించడం మన దేశంలో ఒక రాజకీయ నినాదంలా మారిపోయింది. అధికార పక్షాన్ని ఇరుకున పెట్టేందుకు ప్రతిపక్షాలు వీలైనప్పుడల్లా నల్లధనం అంశాన్ని తెరపైకి తెస్తున్నాయి. ఇప్పుడు తాజాగా ఫ్రాన్స్ అందజేసిన 700 పైచిలుకు హెచ్‌ఎస్‌బిసి ఖాతాల విషయంలోనూ రానున్న శీతాకాల సమావేశాలను దృష్టిలో పెట్టుకుని ప్రతిపక్షం నానాయాగి చేస్తోంది. అందుకు తగ్గట్టుగానే యుపిఏ సర్కారు కూడా ఎన్డీఏ అధికారంలో ఉన్నప్పుడు తమరేమి చేశారంటూ తప్పించుకునే ప్రయత్నం చేస్తోంది. నల్లధనం ఒక రాజకీయ అస్త్రంగా మారింది. అవినీతిపై దేశ ప్రజల్లో పెరుగుతున్న అసహనానికి అన్నా హజారే ఉద్యమానికి వచ్చిన స్పందనే నిదర్శనం. అవినీతిపై ప్రజల్లో పెల్లుబుకుతున్న ఆగ్రహాన్ని గ్రహించి అవినీతి అంతమే లక్ష్యమని రాష్టప్రతి ప్రతిభా పాటిల్, అదే తక్షణ కర్తవ్యమని ప్రధాని మన్మోహన్ సింగ్ ఇటీవల జరిగిన గవర్నర్ల సదస్సులో ఉద్ఘాటించారు కూడా. దేశ ఆర్థిక స్వరూపానే్న మార్చేయగల నల్లధనం వెలికితీతపై ఏలికలు ఇప్పటికైనా శ్రద్ధ చూపాలి. కేవలం జాబితాల విడుదల, వాటిపై విచారణ అంటూ కాలయాపన తగదు. విదేశీ బ్యాంకుల్లో నల్లధనాన్ని పోగేసిన బడాబాబుల వివరాలపై గోప్యత లేకుండా పారదర్శకంగా వ్యవహరించాల్సిన సమయమిదే. నల్లధనాన్ని దేశానికి రప్పించేందుకు తక్షణం నడుం బిగించాలి. ఖాతా జాబితాలను ఇచ్చిపుచ్చుకునే ఒప్పందాలను ఆయా దేశాలపై ఒత్తిడి తెచ్చి అయినా చేసుకోవాలి. తమ్ముడు తన వాడైనా.. అన్న రీతిలో స్వపక్షీయులైనా నల్లకుబేరులపై కఠిన చర్యలు తీసుకుంటేనే అవినీతికి చరమ గీతం పాడగలం. నాన్చుడు ధోరణితో కాలం వెల్లదీయాలని చూస్తే ప్రజాగ్రహానికి గురికాక తప్పదన్న సత్యాన్ని ఏలికలు గ్రహించాలి. నల్లకుబేరుల ఆటలు కట్టించాలి.

http://www.andhrabhoomi.net/sampaadakeeyam/wer-031